Ненави́дящих и оби́дящих нас прости́, Го́споди Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жизнь ве́чную. В не́мощех су́щия посети́ и исцеле́ние да́руй. И́же на мо́ри упра́ви. Путеше́ствующим спутеше́ствуй. Слу́жащим и ми́лующим нас грехо́в оставле́ние да́руй. Запове́давших нам недосто́йным моли́тися о них поми́луй по вели́цей Твое́й ми́лости. Помяни́, Го́споди, пре́жде усо́пших оте́ц и бра́тий на́ших и упоко́й их, иде́же присеща́ет свет лица́ Твоего́. Помяни́, Го́споди, бра́тий на́ших плене́нных и изба́ви я от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и даждь им я́же ко спасе́нию проше́ния и жизнь ве́чную. Помяни́, Го́споди, и нас, смире́нных и гре́шных и недосто́йных раб Твои́х, и просвети́ наш ум све́том ра́зума Твоего́, и наста́ви нас на стезю́ за́поведей Твои́х, моли́твами Пречи́стыя Влады́чицы на́шея Богоро́дицы и Присноде́вы Мари́и и всех Твои́х святы́х: я́ко благослове́н еси́ во ве́ки веко́в. Ами́нь.

Молитвы

Житие святых

"Аз Споручница грешных к Моему Сыну..."

О, Пресвятая Дево, Мати Господа Вышняго, Всемилостивая Заступнице и Покровительнице всех, к Тебе с верою прибегающих! Призри с высоты небесныя славы Своея на мя, припадающаго к подножию Твоему, услыши смиренную молитву мене, грешнаго и недостойнаго раба Твоего, и принеси ю пред Возлюбленнаго Сына Своего. О, Преблагословенная Богородице!

Ты, именуемая всех Скоропослушница и скорбящих Радосте, услыши и мене скорбнаго;

Ты – Утоление печали, утоли и моя душевныя болезни и печали;

Ты – Купино неопалимая, сохрани мир и всех нас от вредоносных огненных стрел вражиих;

Ты – Взыскание погибших, не попусти мене погибнути в бездне грехов моих;

Ты – Целительнице страждущих, исцели и мене, уязвленнаго от немощей душевных и телесных;

Ты – Нечаянная Радосте, радостию спасения Твоего отъемли от мене страх грядущаго мучения;

Ты – Споручница грешных, буди и мне, грешнику, благосердною Споручницею покаяния и спасения моего.

На Тебе по Бозе все мое упование возлагаю, буди ми выну неусыпная Ходатаица и Всесильная Предстательница пред Сыном Твоим, Господом нашим Иисусом Христом, укрепи во мне веру в Него, утверди в любви Его, научи мене любити и славити и Тебе, Пресвятую Матерь Божию: вседержавному покрову Твоему, Богородице, вручаю себе на вся веки. Аминь.